May warrant nieskapo napusilan

CEBU, Philippines — Nasikop ang usa ka lalaki nga buot unta moeskapo atol sa pag-served sa warrant of arrest batok kaniya sa Papan, Sibonga niadtong Huwebes sa buntag ug nakuhaan pa og armas.

Ang nasikop naila nga si Rochie Carillo, 25, walay trabaho, ulitawo ug residente sa Barangay Bae, Sibonga,

Matud ni Police Chief Inspector Stephen Amamag-id, hepe sa Sibonga Police Station, nga ni-served sila sa warrant of arrest batok ni Carillo may kalabutan sa kasong murder diin walay piyansa.

Buot unta moeskapo si Carillo sakay sa iyang Suzuki nga motor hinungdan nga napugos ang arresting officer sa pagpusil sa paa sa akusado.

Atol sa pagkasikop ni Carillo, nasakmitan kini og .38 caliber revolver nga walay serial number ug lima ka bala.

Ang dinakpan dali nga gidala sa Carcar District Hospital apan gibalhin kini sa Dakbayan sa Sugbo nga gibantayan sa kapolisan.

Laing kaso ang atubangon ni Carillo may labot sa iya untang pagsibat ug paghupot og armas. (BANAT NEWS)