Incentives sa tanod sa Bonbon, Taptap doblehon
CEBU, Philippines — Doble na unya ang dawaton nga allowance sa mga tanod sa duha ka bukirang barangay sa Siyudad sa Sugbo human ang Cebu City Office on Substance Abuse Prevention (COSAP) nihimo og rekomendasyon.
Matud sa hepe sa COSAP, Garry Lao, nga dihang ilang gi-review ang weekly accomplishment reports sa Barangay Bonbon ug Taptap, nasuta nga walay reklamo sa maong duha ka barangay.
Ang COSAP niingon nga ang Bonbon nipatuman sa purok system ug wala nagkuwang sa kampanya batok sa ilegal nga drugas.
Si Lao nga mao sab ang co-chairperson sa Cebu City Anti-Drug Abuse Council (CADAC) nihangyo kang Mayor Tomas Osmeña nga hatagan og incentives ug sakyanan ang maong mga barangay.
“Wala nagduha-duha si Mayor, the mayor approved three motorcycles, one service vehicle and usa sa makapa-boost nila is kaning Bonbon ang ilaha ra gyud honorarium from the barangay they are only receiving P500 a month so because they are receiving P4,000 a month from the city financial assistance so the Mayor approved to double their allowances,” sigun ni Lao.
Hinoon magkinahanglan pa kini og resolusyon sa konseho maong nakig-alayon si Lao kang Konsehal Dave Tumulak, chairman sa committee on public order and safety.
Si Tumulak sa iyang bahin niingon nga gawas sa motorsiklo ug sakyanan, ang mga tanod makadawat sab og mga gamit sama sa handheld radio, flashlight, raincoat ug branded nga sapatos. Ang pundo alang niini adto kuhaon sa Philippine Amusement and Gaming Corporation (Pagcor) funds.
Nanghinaut si Lao nga ang Barangay Bonbon ug Taptap mahimong sumbanan sa ubang mga barangay. (BANAT NEWS)
- Latest
