UDS sa VECO di bug-at sa mga konsumidor

CEBU, Philippines — Gipasalig sa kadagkoan sa Visayan Electric Cooperative nga dili mabatyagan sa mga konsumidor ang gastos sa pagpatuman sa Underground Distribution System nga gisugdan sud na sa kapin usa ka tuig.

Ang VECO nisanong sa City Ordinance 1894 o ang pagbalhin sa tanang utility cables sa ilawom sa yuta ug dili na mogamit pa og poste, agi og tubag bahin niining gipangreklamo nga ‘spaghetti wires’ nga nagkutay ibabaw sa kadalanan.

Ang VECO magkinahanglan og milyones ka pesos aron hingpit nga mabutang sa ilawom sa yuta ang tanang kable sa kuryente niini.

Si Anton Perdices, ang Chief Operating Officer sa VECO miingon nga minimal ra kaayo ang pangayoong singil sa gastos niini kay dili gani moabot og usa ka dako.

Nangita usab sila og mga pamaagi aron mamenus-menus ang gastos sa maong proyekto ilabi na nga pwerteng lapara sa dakbayan.

Apan ilahang unahon ang Sinulog route nga mao ang General Maxilom Avenue, P.Del Rosario, New Imus Road, Fuente Osmeña Rotunda ug Osmeña Blvd. ug giapil usab ang bahin sa Osmeña Blvd. gikan sa Fuente Osmeña Rotunda padung sa Kapitolyo.

Migasto ang VECO og P161 Milyones sa underground distribution system (UDS) sa Osmeña Blvd. gikan sa Kapitolyo padung sa eskina sa P.del Rosario nga mao ang Phase 1 ug Phase 1B.

Hinuon sa pagkakaron aduna pa gihapoy nahibiling mga kable ug wires diha sa maong dapit apan dili na iya sa VECO kondili sa mga telecommunication companies.

Si Engr. John Brylle Sanchez, ang Line Design Engineer ubos sa Power Systems Design Department sa VECO mibutyag sa mga tigbalita atol sa gihimong Power Lunch kagahapon nga dako kaayo og impact ang pagbalhin na sa mga linya sa ilawom sa yuta.

Sumala pa niya mas monindot tan-awon ang kadalanan ug mokusog ang negosyo.

Mamenusan usab ang mga power interruptions kay wa nay posteng maigo sa kilat, matumbahan og punoan sa kahoy, wa na unya’y masangit nga trak. - Ian B. Melecio

Immunity sa mga kongresista gisaway

Dili uyon si Gobernador Hilario Davide III sa proposal ni Ilocos Norte Representative Rodolfo Fariñas nga hatagan og immunity ang mga magbabalaod ug ubang government officials bisan pa og makasala sa kadalanan.

Si Davide misaway sa maong sugyot kay dili kini makiangayon.

“Lawmakers and government officials should be the first to follow the law sa traffic especially. Kung ingon ana nganong di man lang mo-report og sayo, mo-opisina , motambong session,” matud ni Davide. Si Fariñas mihangyo kini sa Metropolitan Manila Development Authority (MMDA) nga hatagan og “parliamentary immunity” ang mga kongresista sa mga “minor traffic violations.”

Si Davide nagkanayon nga mismo ang mga kongresista maoy naghimo sa balaod sama sa Traffic Laws hinungdan nga angay nga sila mismo maoy dili molapas niini.

“Si Fariñas mipasabot nga ang maong “immunity” mahimo atol sa session hours, kun diin ang nakalapas nga magbabalaud tugotan nga modiretso sa House of Representatives apan mo-surrender ra ngadto sa otoridad human sa session. 

“I don’t think it’s fair,” si Davide midugang. (BANAT NEWS)