Banat ( Leaderboard Top ), pagematch: 1, sectionmatch: 1

Gang war naghatag og problema sa kabarangayan

CEBU, Philippines — Ang Gender and Development (GAD) personnel ug mga tanod mitug-an ngadto kang Konsehal Dave Tumulak, chairman sa committee on public order and safety kabahin sa problema sa gang war.

Giingong gilauman nga dunay mahitabo nga binaslanay sa matag grupo ug buot nila kining mapakgang. 

Si Tumulak mipatawag og meeting sa GAD personnel, hepe sa barangay tanod ug hepe sa kapolisan sa Pardo, Mambaling ug Punta Princesa Police Station diin kabahin sa kasulbaran sa pagsiaw niining mga gang ang ilang gihisgutan.

Giingong kasagaran nga miyembro sa gang mga menor de edad ug gikataho nga mga armado kini ug giingong gipabuthan sa grupo ang mga tanod.Gikataho usab nga kasagaran sa mga gang naa sa mga barangay sa south district nga gilangkuban sa Duljo Fatima, Mambaling, Punta Princesa, Tisa, Quiot, Basak San Nicolas, Basak Pardo, Cogon, Inayawan, Pardo ug Bulacao diin ang mga miyembro dili residente sa Cebu City apan dunay gikan sa siyudad sa Talisay, Naga ug lungsod sa Minglanilla.

Giangkon sa konsehal nga dili maato sa mga barangay tanod ang pagbadlong sa mga sakop sa gang tungod sa ilang kadaghan nga moabot ngadto sa 50 ka tawo nga magpanon ug sagad makit-an diha sa N. Bacalso Avenue, Sabellano Street ug Tagunol. Si Tumulak mihangyo sa mga barangay nga istriktohon ang pagpatuman sa curfew ordinance aron mahipos og sayo ang mga bata.

Gikataho nga ang maong mga gang manghilabot og tawo ug gani ang bag-ohay nilang nabiktima usa ka 26-anyos nga lalake nga taga Lower Suran, Kinasang-an Pardo nga giingong gikulata ug kritikal ang kahimtang.

Gawas sa pagpatuman sa curfew gusto usab ni Tumulak nga i-regulate kining piso-piso nga internet ug giawhag ang mga sari-sari store nga dili mamaligya og ilimnong makahubog ug sigarilyo sa mga menor de edad.

Ipatuman usab sa siyudad ang Presidential Decree 603 kon “Child and Youth Welfare Code" diin ang mga ginikanan nga magpabaya sa ilang mga anak mahimong pasakaan og kaso.

Atol sa meeting nasayran nga ang kabarangayan naproblema og sakyanan nga magamit alang sa ilang operasyon ug giingong wala ma-renew ang mga rehistro sa sakyanan sa barangay. (BANAT NEWS)

  • Follow Us: