2 babaye, laing 9 sikop sa OTBT
CEBU, Philippines - Nadakpan sa managlahing One Time Big Time Operation sa Lapu-Lapu City Police Office (LLCPO) ang 11 ka pushers nga naglakip sa duha ka babaye ug nasakmit ang kapin sa P200 mil nga kantidad sa shabu.
Si Police Chief Inspector Jaime Tolentino, hepe sa Presinto 5 sa LLCPO, niila sa duha ka babaye nga sila si Jonalyn Camacho, 18, ug Jamelyn Abelong, 21, taga Saac 1, Barangay Buaya.
Dugang nadakpan mao ang mga lalaki nga kauban nga sila si Rechieden Augusto Igot,19; Christian Jade Raran Casio, 18; Angie Mark Abing, 20; Segarra Burgos, 20, ug Brylle Abing, 30, pulos nagpuyo sa Saac 2, Buaya.
Matud ni Tolentino nga ang mga dinakpan ilang nasakmitan og mokabat sa P70,800 nga kantidad sa gidaghanon sa shabu.
Samtang sa Fuentes Road, Pajac alas 8 pasado sa niaging gabii nadakpan sa buy-bust operation ang duha ka pushers nga naglakip nilang Richard Badiang Gastardo, 40, taga Pajac, ug Julius Patigdas Fuentes, 33, taga Ka Juan, Pajac.
Si Chief Inspector Mark Gifter Sucalit, hepe sa City Intelligence Branch (CIB) ug City Drug Enforcement Unit sa LLCPO, niingon nga ilang nasakmit sa mga dinakpan ang 15 ka gagmay nga pakete sa shabu nga balor og P15,104 nga shabu.
Sa Sitio Pasil, Maribago ala una pasado sa hapon sa niaging adlaw maoy nadakpan sila si Joven Taghoy Pangatunggan, 48, ug Jerald Vann Rehoy Cortes, 26, pulos taga Looc, Maribago.
Si Chief Inspector Wyne Magbanua, hepe sa Presinto 2 sa LLCPO, niingon nga ang maong mga dinakpan ilang nasakmitan og 10 ka gagmay nga pakete sa shabu. (BANAT NEWS)
- Latest