Bato: Ayaw mo kahadlok
Si PNP Director General Ronald “Bato” Dela Rosa nitaod og Medalya ng Sugatang Magiting kang PO1 Dennis Valiente nga nasamdan atol sa anti-drug operation. Kristine Joyce Campaña
CEBU, Philippines - Gitaoran ni PNP Chief Police Director General Ronald ‘Bato’ Dela Rosa og Medalya ng Sugatang Magiting ang samdang polis nga si PO1 Dennis Valiente samtang usa ka armas usab ang gihatag kang PO2 Jemuel Villaflores kinsa parehong naangol atol sa drug operation karung buwana.
Kini atol sa ika-116 nga anibersaryo sa pagpanerbisyo sa PNP nga giselebrar sa Police Regional Office-7 kagahapon.
Sa pag-abot ni Dela Rosa sa Sugbo alang sa pagsalmot sa selebrasyon sa ika-116 nga anibersaryo sa pagpanerbisyo sa PNP, giuna niini og bisita ngadto sa tambalanan si Valiente kinsa nabalian og bukog sa tiil dihang napusilan sa drug suspect William Sumalinog, taga Sitio Talong, Barangay Cogon, Cordova didto sa Barangay Mambaling, Cebu City niadtong Agosto 7. Si Valiente nalipay sa pagduaw kaniya ni Dela Rosa ug mipakita sa mga sakop sa media sa x-ray sa iyang walang tiil nga anaa pa sa sulod ang bala nga miigo kaniya.
Samtang, si Villaflores gihatagan og Glock 30 nga armas isip pahalipay sa sakripisyo sa pagpakigbatok sa droga kinsa napusilan sa iyang tuong bukton human misukol og pinusilay kanila ang gipasanginlang narco-cop nga si PO3 Ryan Martus Quiamco atol sa buy-bust operation didto sa Dakbayan sa Talisay niadtong Agosto 15.
Si Quiamco apil sa listahan ni Presidente Rodrigo ‘Digong’ Duterte sa mga drug protectors.
“Kahibalo mo nga ang atong gihimong sakripisyo, dili para sa atong kaugalingon kundi para sa mga kabataan ug sa umaabot nga kabataan. Ayaw mo’g kahadlok. God is watching us,” matud pa ni Dela Rosa. - /EIM) (BANAT NEWS)
- Latest
