Kooperasyon kinahanglan batok Salisi Gang
CEBU, Philippines - Nipahimangno ang direktor sa Cebu City Police Office, Senior Supt. Joel Doria, nga gikinahanglan sab nila ang kooperasyon sa mga tag-iya og mga establisemento batok sa Salisi Gang nga kasagarang biktimahon mao ang mga Korean restaurants.
Niadtong Biyernes nibisita sa opisina ni Police Regional Office-7 Director, Chief Supt. Jose Mario Espino, ang Police Attaché sa Korean Consulate nga si Joseph Shin aron pagsumbong sa pagkabiktima sa pipila ka mga Korean restaurants sa Salisi Gang.
Matud ni Doria nga wala gisumbong sa kapolisan ang maong insidente.
Sumala pa ni Doria nga gikinahanglan gyud ang pagbutang og mga CCTV cameras aron dali masubay sa kapolisan ang insidente ug dunay lig-ong ebidensiya kun mapasakaan og kaso ang responsable.
“We have to make sure na makita ang mukha. Ang iba compliance lang, para ma-prevent ang manakawan sila. Meron tayong gawing basis na hulihin (yung suspect),” matud ni Doria.
Matud ni Doria nga kinahanglan sab mangusog ang mga biktima sa pagpasaka og kaso tungod kay kadaghanan kung mabalik na ang nakuha nga butang, dili na motunga sa hearing sa korte hinungdan nga mabasura ang kaso ug mabuhian ang suspek ug mamiktima na sab sa lain. (BANAT NEWS)
- Latest