CPPO, PDEA-7 nipasalig way abuso

CEBU, Philippines - Walay abuso sa kapolisan sa Dakbayan sa Sugbo sa ilang operasyon batok sa ilegal nga drugas ug gitahud ang tawhanong katungod.

Kini ang tubag ni Cebu City Police Office Director, Senior Supt. Joel Doria, sa pamahayag ni Archbishop Jose Palma kinsa nagkanayon nga sa kadaghan untang pamaagi sa pagpakigbatok sa droga, mas daghan na hinuon ang gihimo pinaagi sa paglapas sa balaud.

Si Doria nitataw nga daghan silang nadakpan nga mga armadong durugista atol sa ilang operasyon apan wala napusili.

Mando niya sa mga sakop ang pag-aresto sa mga gikatahapang durugista apan kun mosukol gamit ang armas, angay lang nga depensahan sab sa polis ang kaugalingong kinabuhi.

“Maraming baril ang nare-recover pero walang encounter. Why? Because they surrender peacefully so buhay sila but if they draw their weapon in any police officers, hindi naman pauuna ang kapolisan natin,” matud ni Doria.

Dugang sa direktor nga kun duna silay madakpan nga bata, itugyan kini nila sa Department of Social Welfare and Development (DSWD).

Samtang ang tigpamaba sa Philippine Drug Enforcement Agency-7 nga si Leia Albiar nibutyag nga gikan sa unang adlaw sa Agosto, unom na ang nangamatay, 12 ang nagtingkagol sa prisohan samtang usa ang nakaikyas sa 16 ka operasyon nga gihimo sa ahensiya sa Central Visayas. Gitataw ni Albiar nga girespeto sa ilang ahensiya ang kinabuhi ug katungod sa ilang dinakpan apan sama sa mga polis, dili sab magpalupig ang mga sakop kun suklan sila sa mga durugista.

“A lifeless suspect is counterproductive to our intelligence work. So as much as possible, paningkamutan sa gyud na sa among mga ahente nga dili gyud mo-resort to killing the subject pero kun at stake na man pud gyud ang kinabuhi sa atong mga ahente ug mga inosente sa surroundings, they will act upon the threat,” matud ni Albiar.

Hangyo sa duha ka ahensiya nga dili mosukol ang madakpan ug mas maayo nga motahan na lang sa kaugalingon. (BANAT NEWS)