Probinsiya sa Sugbo natagak sa ranking

CEBU, Philippines - Wala maapil ang Probinsiya sa Sugbo sa top 20 nga competitive province sa 5th Regional Competitiveness Summit, Cities and Municipalities Competitiveness Index karong tuiga pinasiugdahan sa  National Competitiveness Council (NCC).

Base sa NCC website, ang Probinsiya sa Sugbo anaa karon sa ika-45 nga rank gikan sa 71 ka probinsiya nga naapil, kon diin 32.7467 ang nakuha nga score niini.

Matud ni Roy Soledad ang Investment Promotions Officer nga ang pagpili sa top provinces, cities ug municipalities gibase kini sa economic dynamism, government efficiency, infrastructure ug karon nadugang ang resilience.

Apan siya miklaro nga ang pag-rank sa NCC  sa probinsya sa Sugbo gibase sa upat ka mga haligi nga kinahanglang naa sa mga LGUs. Kini mao ang ilang summary gikan sa score nga nakuha sa mga lungsod ug dakbayan ubos sa lalawigan sa Sugbo.

“Ang kaning ranking man gud sa province is the summary only of the total municipalities and cities under the province it is not gi-rate ang province per se. So it is a summary only, wala kami hold sa performance of every LGU and because they’re just adding it up,” matud ni Soledad.

Iyang gitumbok ang pipila ka rason nga nakatampo sa pag-ubos sa ranking sa probinsiya gikan sa ikatulong pwesto sa tuig 2015 nahimo kining ika-31 sa 2016 ug karon ika-45 na lang hinuon.

Matud pa niya ang pag-usab sa criteria ug pagdugang og laing basehanan nga mao ang “resilience” ang hinungdan niini. Ang resilience mao ang abilidad ug kapasidad sa mga LGUs nga makalahutay ug makabangon gikan sa usa ka katalagman, ug diha gituohan niya posibleng pakyas pag-comply ang mga LGUs.

 “Daghan na sya nga criteria, daghan na kinahanglan nga i-comply sa checklist, daghan sila information nga gipangayo sa kada pillar so baga kaayo nga document,” matud ni Soledad. Gawas niana si Soledad nagkanayon nga niadtong tuig 2015 kon diin ika-3 nga pwesto ang probinsya, naapil pa ang dakbayan sa Lapu-Lapu ug dakbayan sa Sugbo sa overall nga computation alang sa probinsya apan niadtong 2016 wala na kini maapil.

Mao kini ang nakita ni Soledad nga nakaapekto sa ranking tungod kay dako ang tampo sa maong mga dakbayan tungod kay sila mga highly urbanized cities kini. Dugang ni Soledad daghan usab ang niapil nga LGUs karong tuiga. Sa record sa National Competitive Council, ang lungsod sa Cordova nakatungtong sa ika- 20 nga pwesto lang sa 3rd to 6th class municipality. Samtang ang Dakbayan sa Sugbo anaa sa ika-13 nga pwesto alang sa urbanized cities. 

Ang Top3 sa Overall Competitiveness Index mao ang lalawigan sa Cavite nga anaa sa ika-3 nga pwesto, ika-2 ang South Cotabato ug Top 1 ang Rizal.

Aron makabawi ang lalawigan, ang Kapitolyo molusad og  Provincial Competitiveness Challenge  karong Septiyembre 15 diin ang mga  top municipalities ug cities sa 1st ngadto sa 5th class category  pasidunggan ug premyohan og di moubos og P1 Milyon  pagtabang sa mga kulang sa programa sa mga LGUs. (BANAT NEWS)