Kita sa probinsiya nisaka
CEBU, Philippines – Nisaka ang kita sa kagamhanan sa Probinsiya sa Sugbo karong tuiga sumala sa Provincial Treasurer’s Office.
Matud ni Emmanuel Guial nga moabot og P487. 8 milyones ang kita sa probinsya gikan sa local tax sulod sa pito ka buwan itandi sa P423 milyones sa samang mga buwan sa 2016.
Iya sab gibutyag nga hapit na malapas sa probinsiya ang target nga kita karong tuiga nga P504 milyones.
Nakatampo sa pagsaka sa kita sa probinsiya ang information campaign sa ilang buhatan.
“Kaning inyong balita nga gi-intensify ang collection sa province, ma-aware ang mga tax payers nga they have to pay. Aside sa akong information campaign, I do it semi-annually, before the end of December and January,” matud ni Guial.
Dugang niini ang kita gikan sa mga operators sa sand and gravel ug ang kita sa mga provincial ug district hospitals.
Moabot sa P172 milyones ang kita sa Kapitolyo gikan sa local taxes ug regulatory fees. Ang kita sa 16 ka provincial ug district hospitals moabot sa P173 milyones sa pito ka buwan samtang ang Cebu South Bus Terminal moabot na sa P39.9 milyones ang kita diin ang target mao ang P65 milyones. -/GMR (BANAT NEWS)
- Latest
