Pagsalig sa mga Koreano nibalik na

CEBU, Philippines - Nibalik na ang pagsalig sa mga turistang Koreano sa seguridad sa Bohol human sa engkwentro sa kapolisan ug militar tali sa bandidong grupo sa Abu Sayyaf niadtong Abril.

Matud sa Police Attaché sa Korean Consulate nga si Joseph Shin nga karong buwana ang bakasyon sa Korea hinungdan nga modaghan pa gyud ang mga turistang Koreano nga mobisita sa Sugbo ug sa Bohol.

"Korean tourists are willingly ready to come to Bohol. So many Korean tourists enjoy Bohol and Cebu," matud ni Shin.

Nakamugna og dakong kagubot ang pagdunggo sa gisakyang bangka sa mga sakop sa Abu Sayyaf sa Inabanga, Bohol ug gikaengkwentro sa tropa sa gobiyerno diin dunay nangamatay.

Gideklarar nga luwas na sa kahadlok gikan sa mga armadong grupo ang Bohol niadtong Mayo human nahurot sa pagkamatay ang mga bandido. (BANAT NEWS)