Pagdakop sa 2 suspek sa Boniel case legal

CEBU, Philippines - Giklaro sa hepe sa Regional Intelligence Division sa Police Regional Office-7, Senior Supt. Jonathan Cabal, nga legal ang ilang pagdakop nilang Lobo Boniel ug Brian Sayson kinsa gibuhian ra sab dayon.

Gidakop sa kapolisan sa Bien Unido, Bohol silang Lobo ug Brian pinasikad sa warrant of arrest sa kasong pagpatay sa mayor nga si Gisela Boniel, ang asawa sa akusado nga si Bohol Provincial Board Member Niño Rey Boniel.

Lakip sa mga akusado sila si Reolito 'Etad' Boniel, ang timonil sa bangka nga gikargahan sa patay’ng lawas ni Gisela; Ranidel Lupas, ang driver ni Niño; Wilfredo Hoylar ug si Restituto Magoncia Jr. ug dunay wala pa mailhi.

Pinirmahan ni Judge Altone M. Miralles ang warrant of arrest.

Nireklamo ang kampo ni Niño human niingon ang abogado nga nibarug nilang Lobo ug Brian nga si Atty. Inocencio dela Cerna nga ilegal ang pag-aresto tungod kay wala ang ilang mga pangan sa warrant.

Matud ni Cabal kung mogawas na ang resolusyon sa kaso, ila dayon dakpon pagbalik sila si Lobo ug Brian aron dili makasibat.

Si Lobo maoy gitumbok nga tag-iya sa bangka nga gigamit sa pagtambog sa patay’ng lawas ni Gisela sa kadagatan sa isla sa Caubian, Dakbayan sa Lapu-Lapu samtang si Brian sab ang gitumbok nga maoy nag-aghat sa mayor nga mobalik sa Bien Unido tungod kay dunay pirmahanan sa suod nga higala niini nga si Angela Leyson nga kuyog sa mayor sa maong insidente.

Samtang niluwat og release order si Cebu City Judge Sylva G. Aguirre-Pederanga alang nilang Magoncia ug Hoylar human nipasaka og petition for habeas corpus ang mga asawa niini.

Apan matud pa ni Cabal nga wala kini na-served tungod kay nigawas ang laing warrant of arrest diin naapil ang duha nga walay piyansa.  (BANAT NEWS)