109 sikop sa Pokemon

CEBU, Philippines - Moabot sa 109 ka mga tawo ang nasikop, tulo niini High Value Targets ug laing tulo ka drug surrenderers atol sa gipahigayon nga Oplan Pokemon sa kapulisan sa Dakbayan sa Sugbo nga gisugdan alas-2 sa kaadlawon niadtong Huwebes.

Ang operasyon gilusad sa tanang police stations uban ang City Drug Enforcement Unit, ubos sa pagpangulo ni Police Supt. Ryan Devaras, subay sa pagsuperbisar ni Police Senior Supt. Joel Doria.

Sa 109 nga mga nadakpan 59 niini nalambigit sa ilegal nga drugas, 24 kalapasan sa PD1602, duha tungod sa warrant of arrest, ug walo sa kalapasan 9287 samtang ang uban nasikop tungod sa mga nagkadaiyang kaso.

Matud pa ni Senior Inspector Narrolf Tan, deputy chief sa City Intelligence Branch, nakakonpiskar usab sila og mga pinakete nga shabu nga motimbang og 98 gramos nga mobalor og dul-an sa P1.1 milyon, drug paraphernalia, duha ka armas ug halin gikan sa ilegal nga drugas.

Samtang ang Philippine Drug Enforcement Agency-7 nakasikop og upat ka mga tawo atol sa ilang buy-bust operation.

Ang unang operation nahitabo sa may Sitio Bankal, Barangay Kauswagan, Lapu-Lapu City ug nasikop si Gaspar Mejias nga nakuhaan og shabu ug gamit sa pagsuyop.

Sunod nasikop si Ian Varona, 25, taga Sitio Paradise, Barangay Pajo nga nakuhaan usab og katorse ka putos nga shabu.

Ikatulong nasikop sa may Purok 4, Barangay Cabawan District, Tagbilaran City, Bohol mao si Arnel Nofies, usa ka High Value Target, 43, taga Cogon District, Tagbilaran City. Nakonpiskar gikan kang Nofies ang upat ka paketeng shabu nga motimbang og 80 gramos nga mobalor og P400 mil.

Laing nasikop sa may Lumayag Village Dampas, District sa Tagbilaran mao si Rodel Pacna, 20, nga nakuhaan og mobalor P15 mil nga drugas.

Samtang  nasikop usab  sa managlahing buy-bust operation ug checkpoint sa Lapu-Lapu City Police Office (LLCPO)  ang usa ka Roel Icoy Soroño alyas Pataw, 27, diha sa  Sitio Bukid-Bukid-Mahayahay, Barangay Bankal.

Nakuha kaniya ang 11 ka gagmay nga paketeng shabu ug usa ka medium size nga ang tanan nagkantidad og P47, 480.

Nadakpan usab silang Jean Louis Cena Dañas Loy, 42,  Jason Inot Igot alyas Tabelong,26, nga nakuhaan og 11 ka gagmay nga paketeng shabu, usa ka medium  size, salapi nga P500 ug P200 nga marked   money.

Samtang  sa checkpoint sa Presinto 4 sa LLCP nadakpan sa Hanger Road, Barangay Basak si Francisco Olan-Olan Guido, taga Zone 4, Barangay Buaya ug ang angkas  niini nga si Abigail Layan Urot, 28.

Nakuha gikan kanila ang unom ka gagmay nga paketeng shabu ug ang motorsiklo.  (BANAT NEWS)