Avian flu, ubang sakit gibantayan

CEBU, Philippines - Gawas sa avian flu, gi-monitor sab sa Provincial Veterinary Office ang ubang matang sa sakit sa mga manok sa mga poultry farms sa probinsiya.

Matud ni Mary Rose Vincoy, hepe sa PVO, nga nakadawat sila sa pagkamatay sa mga manok sa Lungsod sa San Remigio, Compostela, Minglanilla ug Barili.

Apan sa dihang ilang gisuta, management problem ug bacterial infection ang hinungdan sa pagkamatay sa mga manok.

"We are still free from avian influenza, chickens are still safe to eat," matud ni Vincoy.

Ang PVO mopadala og veterinarian sa mga pantalan sa probinsiya aron pagpugong nga adunay makasulod nga poultry products gikan sa Luzon.

Sa16 ka pantalan sa Lalawigan sa Sugbo, priority karon sa PVO ang mga pantalan nga adunay access sa mga barko nga gikan sa Luzon sama sa Polambato sa Dakbayan sa Bogo ug Hagnaya sa San Remigio diin modunggo ang mga barko sa Masbate.

"We need to protect our industry and protect our people," matud ni Vincoy.

Matud niya nga importante ang maong mga veterinarians nga maoy mobantay sa mga poultry products nga mosulod sa probinsiya.

Kini human ang Department of Agriculture ni-ban sa pagsulod sa poultry products gikan sa Luzon padulong sa Visayas ug Mindanao.

Ang Probinsiya sa Sugbo momugna kini og Avian Flu Task Force alang sa ilang surveillance. (BANAT NEWS)