Manipis nakadawat na sa hinabang

CEBU, Philippines - Nadawat na gyud sa kadagkuan sa tunghaan sa Manipis ang tseke nga gisaad sa Asia Brewery nga kompaniya niadto pang tuig 2015.

Ang Asia Brewery Inc. maoy sponsor sa Cobra Ironman 70.3 Philippines.

Ilang gitunol ang tseke nga balor og P300 mil isip financial assistance kagahapon sa buntag sa buhatan ni Talisay City Mayor Eduardo Gullas.

Ang maong isyu nitumaw human si Alvin Santillana, pangulo sa City Disaster Risk Reduction and Management Office, ang nipadayag nga iyang gihimo ang rekomendasyon nga dili apilon ang Siyudad sa Talisay sa rota sa Ironman karong tuiga tungod sa saad niini nga wala pa gyud natuman.

Ang iyang rekomendasyon giduso ngadto ni Gullas kinsa nasuko ug nihulagway nga nagpa-mayor-mayor si Santillana ug wala siyay katungod nga moestorya niini.

Niapil sab og kasuko ang organizer sa Ironman tungod kay mao man ang gipanganlan ni Santillana nga wala motuman sa saad apan diay ang Asia Brewery Inc. man ang sponsor.

Tungod niini si Geero Aldeck Ebrada, assistant branch manager sa Asia Brewery, maoy nitunol sa tseke ngadto ni Zenaida Silva, principal sa Manipis Elementary School.

Asoy pa ni Ebrada nga nalangay ang paghatag nila sa hinabang tungod kay wala pa makaproseso sa duha ka requirements ang tunghaan nga mao ang official receipt sa Talisay City Division ug Certificate of Registration sa Manipis Elementary School.

Si Silva nitataw nga miscommunication lang ang nahitabo tungod kay ang kontak ni Silva gikan sa kompaniya nga mohatag sa hinabang ang niundang na sa trabaho. (BANAT NEWS)