Iron Man di na palahuson sa Talisay

CEBU, Philippines - Posibleng kutob na lang sa Siyudad sa Sugbo ug dili na molahos ang rota sa Iron Man karong tuiga sa Siyudad sa Talisay. Kini human si Alvin Santillana, pangulo sa Talisay City Disaster Risk Reduction and Management Office, nihulagway nga aduna’y saad ang organizer kaniadto nga wala pa tumana.

Si Santillana nibutyag nga niadtong 2015, ang organizer nipasalig nga mohatag og financial assistance sa tunghaan sa Manipis nga kantidad og P300 mil apan hangtud karon wala pay bisan piso nga naabot.

“Makasabot ta nga donation na pero dili sad seguro nga paabton pa og 2 years. Unya lisud-lisuron pa gyud ang tagaan kay daghang mga requirements nga ilang gipangayo,” matud ni Santillana.

Asoy pa niya nga sa dihang nagkinahanglan ang Iron Man sa ilang tabang, wala sila’y daghang pangutana kun dili mao ang paghatag dayon sama sa pagpa-deploy sa mga tawo.

Nagkanayon si Santillana nga ang principal sa tunghaan sa Manipis nitug-an kaniya nga nag-picture lang ang taga Iron Man kanila uban sa dakong card board nga giporma og tseke dayon wala na sila mopatim-aw.

Matud ni Santillana nga moduso siya og rekomendasyon ngadto kang Mayor Eduardo Gullas kalabot sa maong isyu.Aduna sila’y mga rekisitos nga gipangayo karon sa Iron Man sa dili pa sila mohatag og go signal nga sila makaagi sa Dakbayan sa Talisay.

Hinuon magdepende lang kini sa mayor kun unsa gyud ang iyang baruganan sa maong isyu

Ang Iron Man ipahigayon karong Agosto 5 hangtud 6.  (BANAT NEWS)