Plate number sa motor dali na makit-an
CEBU, Philippines - Gihangop sa kapolisan ang pagpatuman na sa Motorcycle Crime Prevention Act of 2017 tungod kay dako kini og tabang sa pagpaminus sa krimen ilabi na sa mga kaso sa riding-in-tandem.
Matud pa sa tigpamaba sa Cebu City Police Office, Chief Inspector Ramoncelio Sawan, nga dako og tabang sa kapolisan ang maong initiative.
Sumala pa ni Sawan nga maalerto na sab ang katawhan sa pagtan-aw sa mga plate numbers diin dali ra nila ang pagtaho sa mga malambigit sa krimen.
Ang regional director sa Police Regional Office-7, Chief Supt. Jose Mario Espino, nibutyag nga kini ang ilang nakita nga pamaagi sa pagpakgang sa krimen nga gihimo sa mga motorcycle riding-in-tandem nga mohimo og pagpanglabni, pagpanulis ug pagpamusil.
Sumala pa ni Espino nga dugay na nilang gipangayo sa kapolisan ang maong balaud aron sa pagpasayon sa pag-ila sa mga motor nga gigamit sa krimen.
Dugang ni Espino nga makatabang ang maong balaud sa pagpakunhod sa mga krimen ug dili na kinahanglan ang checkpoint kay dali ra makita sa mga law enforcers ang mga motor nga wala nisunod sa maong balaud. (BANAT NEWS)
- Latest
