Karambola sa sakyanan, 1 patay, 10 angol

CEBU, Philippines - Usa ang patay samtang dili momenos sa 10 ang samdan human nagkarambola ang lima ka sakyanan sa Sitio Baud, Barangay Media Once sa Dakbayan sa Toledo kagahapong adlawa.

Giila ang namatay mao si Christopher Nadela, taga Dakbayan sa Naga kinsa sakay sa gimanehong motorsiklo dihang nasampak sa usa ka tanker.

Sa inisyal nga imbestigasyon usa ka tanker nga adunay plakang GDT 496 ang naghaguros ang dagan nga gituohang nawad-an og brake hinungdan nga giharos ang usa ka delivery van nga paingon untang motungas sa bakilid nga dalan.

Samtang adunay laing usa ka SUV nga adunay plate number YLM 409 ang daling nakapadaplin dihang nakabantay nga gidaro sa tanker ang van.

Apan wala makalikay ang motorsiklo nga gisakyan ni Nadela hinungdan nga nasampak kini sa tanker ug nabunal.

Ang drayber sa tanker ug laing duha ka sakay ang samdan, samtang ang delivery truck adunay upat ka sakay dala sa drayber ug laing drayber og nagmotorsiklo nasamdan.

Ang mga biktima nga daling gidala sa Toledo City Hospital ug atol ning paghimo sa balita wala pa makahatag og dugang impormasyon ang kapolisan sa ilang mga pangalan.

Matod ni Kapitan Ranick Restauro sa maong barangay wala na makontrol sa drayber ang tanker hinungdan sa pagbangga niini.

Samtang usa ka Gloria Baguio, 62, residente sa lugar nagkanayon nga adunay usa ka balay nga naguba human malabay didto ang van. Swerte hinuon nga wala ra maunsa ang tulo ka batang nagpangidaron og 4, 5 ug 6 anyos  nga anaa sulod apan ang usa nagkaligo sa gasoline sa maong sakyanan. (BANAT NEWS)