Klasmit Boyet napagan ra sa dakop

CEBU, Philippines - Gihulagway sa magsisibya ug kandidato sa pagka-gobernador sa Sugbo sa niaging eleksiyon, Roliveth “Klasmit Boyet” Cortes, nga kidnapping ang nahitabong pagdakop kaniya ug higala nga babaye sa kaulohan.

Kini gumikan kay wala sila nasayod sa pasangil kanila ug gidala ug gipasakay sila sa van paingon sa buhatan sa Criminal Investigation and Detection Group sa Caloocan City nga wala gani moatubang ang reklamante.

Apan matud ni Cortes nga gumikan kay dunay gisang-at nga reklamo, ila na lang sab tubagon.

Matud sa abogado ni Cortes, kanhi kongresista Didagen Dilangalen, nga mismo ang prosekusiyon wala makapakita og ebidensiya sa pagsang-at sa kasong simple estafa ug usurpation of authority.

Masaligon si Dilangalen nga makalingkawas ra sa kaso si Cortes ug kauban nga si Dr. Cecilia Lucentales kinsa gipasanginlang nangilkil og P50 mil sa usa ka tawo nga giingong gipasaligan nga makasulod og trabaho sa buhatan sa Bureau of Customs.

Mensahe ni Cortes sa mga nagpaluyo sa kaso nga dili abusohan ang katungdanan ug kung nahitabo kini kaniya nga usa ka sakop sa media ug politiko, labi pa nga mahitabo kini sa mga ordinaryong tawo.

Gibutyag ni Cortes nga nangaon sila human sa prayer meeting kauban sa kapin sa 30 pa ka tawo sa condominium diin nahimutang sab ang tambalanan ni Lucentales sa Pasay City. Duha ka tawo ang niduol kang Lucentales ug natayming nga niagi si Cortes gikan nikuha og pagkaon ug gipalingkod tupad sa doktora kinsa gitunolan og folder dayon gikuhaan og hulagway ug gidakop.

“Ang ako kahimtang murag nagtan-aw og sabong nga naapil sa dakop,” matud ni Cortes.

Dugang ni Cortes nga ang condominium maoy gihimong headquarters sa September 26 Run Duterte Movement nga gipangulohan ni Lucentales isip chairman ug presidente sa Save the Entire Philippines Organization (SEPO) diin si Cortes maoy area executive director for Visayas. (BANAT NEWS)