Mga 4Ps wa pugsa papalit og bugas
CEBU, Philippines - Gihimakak sa Department of Social Welfare and Development nga ilang gipugos ang mga benepisyaryo sa Pantawid Pamilyang Pilipino Program nga sa usa lang ka tindahan mopalit og bugas.
Si DSWD-7 Director Maria Evelyn Macapobre nipahibawo nga ang mga benepisyaryo sa 4Ps gitudloan sa kagawasan sa pagdiskarte sa ilang kaugalingon aron sila magpuyo nga malambuon uban sa ilang pamilya.
Giangkon niya nga dunay mga estorya nga iyang nadungog apan walay niabot nga pormal nga reklamo kung asa nga lugar ug kinsa ang nihimo niini.
Nagkanayon si Macapobre nga iyang imbestigaron kun adunay tawo nga mobarug sa iyang buhatan ug mosumbong nga sila gipugos og papalit sa bugas sa usa lang ka tindahan.
Iyang giklaro nga adunay sitwasyon o lugar nga ang sakop sa 4Ps mismo ang namaligya og bugas.
Si Macapobre nidugang nga subli niyang pahinumduman ang iyang mga sakop sa paglikay sa ingon ini nga binuhatan aron dili mag-atubang og kaso. (BANAT NEWS)
- Latest
