Nasunogan sa Calamba state of calamity na

CEBU, Philippines - Hingpit na nga gideklarar ang Sitio Mahayahay 1 ug 2 sa Barangay Calamba, Dakbayan sa Sugbo nga ubos sa state of calamity.

Matud ni Raul Laborte, barangay secretary, nga P136 mil ang gamiton nila gikan sa ilang calamity fund nga maoy gikauyonan sa konseho sa barangay atol sa emergency session kagahapon.

Samtang dunay ipatuman nga programa ang kagamhanan sa Siyudad sa Sugbo sa Barangay Calamba aron dili na masubli ang maong hitabo.

Matud sa pangulo sa Cebu City Disaster Risk Reduction and Management Office, Nagiel Bañacia, nga kun makabalik og tukod ang mga biktima sa ilang panimalay, ipatuman nila ang “Build Back Better”.

Maglisud ang siyudad sa re-blocking sa dapit sanglit dunay bahin nga private lot ug ang tag-iya dili mosugot.

Ipaubos usab nila og pagbansay-bansay ang mga residente sa dapit aron kun dunay sunog nga motumaw makaresponde dayon.

Nakita sa CCDRRMO nga hagip-ot ang dalan sa dapit ug daghang wires hinungdan nga naglisud sa pagsulod ang bombero.

Kun mapatuman na ang maong programa ang pundo alang niini adto kuhaon sa disaster management funds.

Subay niini, ang pangulo sa Division for the Welfare of the Urban Poor, Atty. Meriam Fernandez, niingon nga kadtong mga residente nga nagpuyo sa yuta sa gobiyerno makabalik pa og tukod sa ilang panimalay apan kinahanglan mosunod sa subdivision plan.

Apan giangkon niini nga dunay gamay’ng problema tungod kay ang maong dapit gipaubos sa beneficiary screening committee sa Local Housing Board kung mo-qualify ba sa housing.

Samtang naghatag na sab og inisyal nga tabang ang Department of Social Welfare and Services (DSWS) sa mga biktima sa sunog ug subli silang nagpahigayon og revalidation sa lista aron mahibaw-an kun kinsa kadtong makadawat og financial assistance gikan sa siyudad.

(BANAT NEWS)