Halin sa sigarilyo nimenus

CEBU, Philippines - Namatikdan dayon sa mga sidewalk vendors nga namaligya og sigarilyo ang pagkunhod sa ilang halin nunot sa pagpatuman sa Smoking Ban  sa nasud sugod niadtong adlaw nga Domingo.

Si Fermin Almeres, 52, taga Maguikay , Dakbayan sa Mandaue ug sidewalk vendor sa Highway nga nahinabi sa Banat News miingon nga nimenus gyud ang namalit og sigarilyo. Gitataw niya nga kon mohingusog na gayod sa pagpanakop ang mga polis sa pagpanigarilyo sa publiko nga mga lugar dako gayod ang kahigayonan nga mawad-an usab siya og mga kustomer.

Si Lito  Amaya, 26, taga Consolacion ug namaligya og sigarilyo sa Barangay Basak sa maong dakbayan miingon nga sagad sa iyang mga kustomer  mao ang mga drayber ug pasahero nga mag-atang og sakyanan.

Dugang pa niya nga P350 iyang kitaon matag adlaw sa pagpamaligya og sigarilyo nga maoy  gibuhi niya sa iyang kapikas sulod na sa tulo ka tuig.

Nalakip usab sa maong kamandoan ang pagdili sa pagpamaligya og sigarilyo sa gilay-on nga 100 metros gikan sa mga tulunghaan o playgrounds ug giawhag usab ang matag lokal nga kagamhanan sa pagbutang og designated smoking area  aron sa maong dapit itugot ang pagpanabako  sa mga tawo.

Sa pakighinabi sa Banat News kang Cebu City Environment and Natural Resources Office (CENRO) Executive Assistant, Lito Chavez siya miingon nga kadtong mga establisamento nga wala  magbutang og designated smoking areas dili na maka-renew sa ilang business permit. Ang DSAs kinahanglang duha ka metros ang gilay-on niini sa pultahan nga dili smoking area mao ni gitawag nga buffer zone. Si Chavez nagkanayon nga aduna silay tulo ka inspectors ug Barangay Environmental Officer nga mag-inspeksyon sa mga establisamento kun sila molukat o mo-renew og business permits. Romeo Limpangog ug  Janine Ramil (BANAT NEWS)