Paggamit sa P26.8M ipaagi ra sa resolusyon
CEBU, Philippines - Ipaagi na sa resolusyon ug dili ordinansa ang P26.8 Milyones nga pundo nga gamiton alang sa hauling operation sa siyudad sa Sugbo karong buwana.
Kini human ang Philippine Amusement and Gaming Corporation (PAGCOR) mihatag og katin-awan kalabot sa pangutana sa konseho sa siyudad sa legalidad sa pagamit sa maong pundo.
Si Cebu City Mayor Tomas Osmeña maoy nagpahibawo nga ang PAGCOR mipagawas na og desisyon nga ipaagi kini sa resolusyon human gisultihan siya sa iyahang kapikas nga si Konsehal Margarita Osmeña nga maoy bag-ong majority floor leader sa konseho.
Niadtong Hulyo 11, ang konseho pinaagi sa mosyon ni Konsehal Jose Daluz III nangayo og katin-awan sa bag-ong guidelines sa PAGCOR human si Konsehal Eugenio Gabuya Jr. mipalabang og resolusyon nga nangayo og pagtugot sa konseho paggamit sa P26.8 million ubos sa PAGCOR funds.
Nakalatid sa bag-ong guidelines sa PAGCOR nga giisyu niadtong buwan sa Abril ning tuiga nga ang charging sa pundo ubos sa maong account ipaagi og ordinansa.
Hinuon, sigon ni Mayor Osmeña kinahanglan gihapon nila ang approval sa konseho una makapadayon sa emergency procurement sa service provider.
Ang P26.8 million ipaagi sa emergency procurement ug dili public bidding human ang nahibilin nga P25 million sa P40 million gikan sa buwan sa Hunyo gipaabot nga kutob na lang sa petsa 27 ning buwana.
Nagkanayon si Mayor Osmeña sa mga nahibiling buwan ning tuiga ang siyudad dili na mogamit og emergency procurement apan moagi na og regular public bidding. (BANAT NEWS)
- Latest
