Mga ginikanan sa Talisay nahasol sa gang

CEBU, Philippines - Gihasulan na ang mga ginikanan sa Siyudad sa Talisay sa grupo-grupo sa mga batan-on nga maoy nagdala og samok.

Si Felipa Solana, pangulo sa City Social Welfare and Development (CSWD), niingon nga daghan na sa mga ginikanan ang niduol sa ilang buhatan ug nagpakitabang aron mahusay o mawagtang na ang grupong Kalmados ug STY Gang nga maoy gikabuangan sa ilang mga anak.

Matud ni Solana nga nag-abot gyud sila sa Barangay Lawaan 1 sa mga ginikanan ug mga batan-on tungod niining nisiaw nga grupo.

Ang STY ug Kalmados maoy kontra partidong grupo diin kasagaran sa mga sakop pulos menor de edad ug magtapok matag gabii hangtud na sa kadlawon sa bisan asang lugar sa siyudad.

Gani usa ka Rodulfo Banguisio, 41, usa ka traysikad driver, ang nidangop sa kapolisan ug nisumbong nga wala na mauli ang iyang 15-anyos nga batang babaye sa ilang panimaye niadtong Domingo.

Iyang nasuta nga nikuyog kini sa uyab nga sakop sa Kalmados hinungdan nga siya nagduda nga sakop na sab sa maong grupo ang iyang anak.

Matud niya nga iya nang gisuroy ang mga balay sa barkada sa iyang anak apan wala gyud niya makit-i.

Si Solana nagkanayon nga unta moadto sa ilang buhatan si Banguisio aron ilang matabangan nga makit-an ang iyang anak.

Giawhag sab ang mga lider sa STY ug Kalmados nga mosanong kun sila ipatawag sa gobiyerno. (BANAT NEWS)