Dalaga, laing 6 sikop sa buy-bust
CEBU, Philippines - Nasikop ang gikatahapang lima ka pushers og shabu nga naglakip sa usa ka babaye sa managlahing buy-bust operation sa mga sakop sa Lapu-Lapu City Police Office (LLPO) diin nasakmit ang mokabat sa P100,000 nga kantidad sa shabu.
Sa Purok Kalinga sa Sitio Soong 1, Barangay Mactan alas 2 pasado sa niaging kadlawon nadakpan ang usa ka babaye nga giila nga si Merian Malingin Espeñuza, 31, dalaga.
Nadakpan sab ang laing pusher nga si Reynaldo Igot Abing, 47, taga Sitio Pool sa maong barangay ug nasakmit gikan kanila ang 23 ka gagmay nga pakete sa shabu. Dugang nadakpan mao si Alberto Dela Peña Repuela, 30, sa Barangay Bankal ug nasakmit ang 16 ka gagmay nga pakete sa shabu.
Sa laing buy-bust operation sa Sitio Kalinga, Barangay Mactan nadakpan ang duha ka gikatahapang pushers og shabu nga giila nga sila si Michael Casio Mahusay, 51, ug Neregin Canoy Rombo, 39, kinsa nasakmitan og napulo ka gagmay nga pakete sa shabu.
Samtang duha ka durugista ang nasikop sa kapolisan sa Dakbayan sa Talisay sa Sitio Tunga, Barangay Tangke kagahapon sa kadlawon.
Ang mga dinakpan mao sila si Kevin Rosada, 22, ug si Rammie Racaza, 27, pulos nagpuyo sa maong lugar.
Matud ni PO2 Edwin Campomanes sa Talisay City Police Station nga gisubay na nila ang pangan nga gihatag sa mga suspek nga maoy ilang gikuhaan sa mga ginadiling drugas.
(BANAT NEWS)
- Latest
