Pangandam sa ASEAN Meeting kasado na

CEBU, Philippines – Magsugod na sunod semana ang ikaduhang hugna sa Association of Southeast Asian Nations (ASEAN) Ministerial Meetings dinhi sa Sugbo gikan sa Hulyo 1 hangtod na sa petsa 7.

Isip pagpangandam sa seguridad sa Siyudad sa Sugbo, si Konsehal Dave Tumulak ang Deputy Mayor for Police Matters niingon nga nahiluna na ang tanan nilang plano alang sa maong kalihukan.

Gani adunay augmentation gikan sa National Capital Region nga niabot kagahapon nga gilangkuban sa K-9 dog handlers ug EDO Team.

Dugang sa konsehal nga gibantayan na sab ang pito ka hotel nga maoy puy-an sa mga delegado sa maong kalihukan.

Nunot niini, niawhag si Tumulak sa publiko nga mosabot sanglit adunay rerouting nga ipatuman sa kadalanan sama sa S. Osmeña ug sa St. Pope John Paul II. Hinoon dili tibuok adlaw nga ipatuman ang rerouting kay adunay oras nga gisunod ang mga delegado nga moagi sa maong mga dapit.

Nakig-alayon sab sila sa Maritime, Coast guard, Highway Patrol Group ug ubang unit sa kapolisan aron motabang sa peace and order.

Gibutyag sa konsehal nga human sa ministerial meeting, giingong adunay mga delegado nga gustong mobisita sa tourist destinations sa Sugbo hinungdan nga lakip kini sa ilang gipabantayan.

Samtang base sa intelligence monitoring sa law enforcement agencies, matud ni Tumulak nga walay nadawat nga hulga apan kini nitataw nga kinahanglan gihapong magbinantayon dili lang ang mga tinugyanan sa balaod apan lakip na ang publiko.

Subay sa maong kalihukan, mopakatap og medical personnel ang Department of Health (DOH)-7 sugod karong adlawa matud ni Dr. Shelbay Blanco ang pangulo sa Regional Epidemiology and Surveillance Unit.

Nagkanayon si Blanco nga sugod niadtong Hunyo 26, nipaubos na sila sa code white diin tanang medical personnel ang naka-standby ug walay gitugotan nga maka- leave o absent. Kini aron matibuok ang 27 ka teams uban sa 27 ka ambulansiya nga gilangkoban og 180 ngadto sa 200 ka mga medical personnel.

Siyam ka task force referral hospitals sab ang ilang giandam nga gilangkuban sa mga pribado ug pampublikong tambalanan. Nipahimutang usab sila og 6 ka staging area sa mga Dakbayan sa Lapu-Lapu, Mandaue ug Cebu.

Nakig-alayon na sab sila sa Cebu City ug Probinsiya sa Sugbo alang sa dugang ambulansiya gawas sa ilang augmentation gikan sa kaulohan. -/DILT (FREEMAN)