P28.9M Pagcor fund maoy gamiton paghakot sa basura

CEBU, Philippines – Ang Department of Public Services sa Siyudad sa Sugbo mogamit sa pundo sa Philippine Amusement and Gaming Corporation alang sa paghakot sa basura sa hauling operation sunod buwan.

Kini human gikatakdang mahuman ang kontrata sa Pasajero Motors Corporation nga maoy kasamtangang private hauler sa siyudad sa unang semana sa buwan sa Hulyo.

Ang maong lakang sa DPS giaprobahan ni Mayor Tomas Osmeña nagkantidad og P28.9 milyones gamiton sa DPS diin gikuha sa pundo sa PAGCOR.

Ang pag-aprobar ni Osmeña pinaagi sa pagpirma sa suwat nga gibuhat ni DPS head Roberto Cabarrubias nga nangayo og pagtugot sa mayor.

Gisaysay sa maong suwat nga ang paggamit sa maong pundo nagsubay sa bag-ong guidelines sa PAGCOR nga ang paggamit sa pundo alang sa hauling operation gitugot.

Ilaha usab kining gibuhat tungod naghuwat pa sila sa pag-aprobar sa supplement budget nga ilahang gipangayo nga nagkantidad og P120 milyones.

Sa paghinabi sa Banat News ngadto kang John Paul Gelasque, DPS assistant department head, siya miingon nga adunay dakong posibilidad nga pinaagi sa emergency procurement mas dali ang pagkuha og kontrata sa service provider kon itandi sa public bidding.

Posibleng moapil balik sa canvassing ang Pamocor ug Jomara Konstruckt Incorporated nga maoy kanhi service provider sa siyudad.

Ang Bids and Awards Committee mopili sa service provider nga nagtanyag og kinaubsan nga presyo. Gikatakda nga iduso kini sa konseho alang sa ilang pagtugot sa maong lakang. -/EIM (BANAT NEWS)