77-anyos napunggit sa trak

CEBU, Philippines – Usa ka 77- anyos nga lola nga lugos na makadungog naligsan patay sa usa ka delivery truck diha sa Barangay Pajo, Daanbantayan.

Ang biktima giila nga si Teodula Bacatan Yaun residente sa Sitio Lubi, Pajo, Daanbantayan samtang ang nakaligis mao ang delivery truck driver nga si Juan Regenald Cañete Sayon, 39, taga Cabadiangan, Compostela, Cebu.

Matud pa sa imbestigador nga si PO3 Victor Avenido nga sa iyang inisyal nga imbestigasyon gikan nag-deliver sa barangay Poblacion sa Daanbantayan ug padulong na unta pauli sa Dakbayan sa Sugbo si Sayon.

Pag-abot nila sa nahitaboan kalit nga nilabang ang biktima ug wala na naka-brake si Sayon maong napunggit kini.

“Sigun sa mga paryente niya, bungol kuno to mao siguro wala siya kadungog nga nagdulong na ang truck,” si Avenido miingon.

Daling gidala sa Daanbantayan District Hospital ang maong biktima apan gibalhin sa ospital sa Dakbayan sa Sugbo apan samtang nagbiyahe nabugtoan na kini sa iyang kinabuhi.

Wala pa matino kung andam ba nga mopasaka og kaso ang kabanay sa biktima, si Avenido miingon. -/EIM (BANAT NEWS)