Kapin P2M shabu nasakmit

CEBU, Philippines – Mobalor og P2 milyones nga shabu ang nakuha atol sa managlahing drug buy-bust operation sa Barangay Duljo-Fatima  niadtong Sabado sa gabii ug sa Barangay Quiot Pardo kagahapon sa kaadlawon, usa sa mga suspek lola na.

Niadtong Sabado sa gabii, gironda sa mga sakop sa Cebu City Police Office (CCPO) City Intelligence Branch ug City Drug Enforcement Unit  ang Sitio C. Padul 1, Barangay Duljo-Fatima.

Didto nadakpan ang 54-anyos nga ginang nga si Gloria Dayonot ug nakuhaan kini og usa ka dakong pakete ug unom ka medium nga pakete sa gidudahang shabu diin mokabat na og P1,003,000.

Samtang pagkaala- una kagahapon sa kaadlawon ila usab gironda ang Bayanihan Village, Barangay Quiot-Pardo ug nasikop ang High Value Target 1 nga si Joana Orongan Quiloan, 20, taga Barangay Looc, Dakbayan sa Lapu-Lapu.

Lakip nga nasikop ang duha niya ka mga kakunsabo nga silang Jeffey Bacalso Radaza, 43, ug si Jan Gerard Luna Redulla, 25.

Nakuha gikan nila ang duha ka dagko, walo ka medium ug walo ka small packs nga gituohang shabu nga kung sumahon ang kantidad moabot na kini og P1,065,776.

Matud pa sa hepe sa CIB nga si Police Chief Inspector Christopher Navida nga konektado silang Dayonot ug ang grupo ni Quiloan sa usa ka Jerome Gonzales alyas Tulisan kinsang una nang nadakpan sa Mandaue City Police Office sa kasong may kalabutan gihapon sa druga. -/EIM (BANAT NEWS)