Kolurom vans gipamulta sa LTO-7

CEBU, Philippines - Gisikop sa mga ahente sa Land Transportation Franchising and Regulatory Board-7 ang tulo ka vans human napamatud-an  ang duha niini walay prangkisa ug ang usa nag-operate isip V-hire bisan tourist van ang prangkisa.

Matud pa ni LTFRB-7 regional director Ahmed Cuizon nga ang duha nag- operate isip school transport nga walay prangkisa. Didto kini gidakop sa Liloan. Gipamulta sa LTFRB-7 og tag P200 mil ang matag usa ug gi-impound pa gyud ang ilang mga sakyanan.

Samtang ang tourist van nadakpan sa usa ka mall sa siyudad sa Mandaue nga naaktohan gyud nga nagpasakay og mga pasahero ug nangolekta og tag P40 matag pasahero padung sa Liloan. Matud pa nga bisan duna kini prangkisa apan nalapas niini ang mga kondisyon sa iyang prangkisa. Wala kini gi- impound apan gipamulta ang tag-iya og P6,000 ug laing P4,000 isip multa sa uban pang minor violations nga nakita.

Dugang pa ni Cuizon nga kung maka-violate na usab matangtangan kini og prangkisa ug di na  maka-operate og Public Utility Vehicle. (BANAT NEWS)