13 sikop sa shabu sa Lapu-Lapu

CEBU, Philippines - Nasikop sa managlahing buy-bust operation sa mga sakop sa Lapu-Lapu City Police Office (LLCPO) ang 13 ka gikatahapang pushers ug nasakmit ang dul-an sa usa ka milyon ka pesos nga kantidad sa gituohang shabu.

Sa Purok Balanghoy, Gun-ob, alas 12 pasado sa udto niadtong Huwebes maoy nadakpan ang walo ka gikatahapang pushers ug mga adik.

Giila ang mga suspek nga sila si Regla Mae Cosep Agujar alyas Iglat, 31; Reynaldo Casinillo Salazar alyas Rey, 48; Rubin Cuizon Mangubat alyas Panot, 40, nga mga residente sa Purok Balanghoy; Junil Bontilao Sibonghanoy alyas Nil, 40; Leonilo Anticristo Basoy alyas Leonil, 37; Aniceta Pijo Zamoras alyas Inday/Angel, 25, mga residente sa Progress, Barangay Gun-ob; Romel Fabroa Gubalane, 29, taga Ugsang Compound, Barangay Pajo, ug Abraham Abarques Berdigan, 26, usa ka massage therapist nga taga Olango Island.

Si Inday/Angel ang nidawat sa P200 nga marked money ug gitunol usab ni Agujar ang usa ka gamay nga pakete sa shabu hinungdan nga ilang gidakop.

Nasakmit ang dugang 19 ka gagmay nga pakete sa shabu ug sa sulod sa panimalay niini didto sab ang laing unom ka tawo nga nagsuyop og shabu ug nasakmit ang tagsa ka gagmay nga pakete ug mga drug paraphernalia.

Samtang sa Sitio Nangka Lumoy, Gun-ob sa alas 2 pasado sa hapon sa maong adlaw maoy nadakpan sila si Jimboy Tampus Sanchez, 27, taga Ibabao, Cordova; Maruo Tampus Cereza, Jr., taga Purok Butterfly, Babag sa maong dakbayan ug ilang nasakmit ang 10 ka gagmay nga pakete sa shabu ug usa ka medium-size.

Dugang nadakpan sa Sitio Datag, Pusok mao si Mardy Saranillo Castañares, 31; John Isidro Macua dela Cerna, taga Catarman, Cordova ug John Andrew dela Cerna ug nasakmit ang 15 ka gagmay nga pakete sa shabu ug P500 nga gituohang halin. (BANAT NEWS)