Barangay alarm system gihangop sa CDRRMO

CEBU, Philippines - Gihangop sa Cebu City Disaster Risk Reduction and Management Office (CCDRRMO) ang gihimo sa konseho sa siyudad nga nag-awhag sa kabarangayan sa pag-establisar og Barangay Alarm System.

Si Konsehal Jocelyn Pesquera ang niduso sa resolusyon sa maong awhag aron ang publiko ma-update kalabot sa disaster related information pinaagi sa paggamit og communication device nga madunggan sa publiko.

Gipasabot sa pangulo sa CDRRMO, Nagiel Bañacia, nga sa disaster management usa sa importante sa pagpangandam sa katalagman ang warning system.

Gihulagway ni Bañacia nga mas maayo ang Barangay Disaster Council mo-identify sa unsay makaayo sa ilang komunidad lakip na ang mga gikinahanglan nga kagamitan sama sa trumpa ug uban pa.

Ang siyudad dunay early warning system nga naa sa mga flood prone areas diin ang dike gipintalan og sama sa ruler aron mahibaw-an ang water level ug kung moabot na sa critical level mopagawas dayon og warning.

Gihimo kini sa mga flood prone areas sama sa Kinalumsan River, Mahiga Creek ug Guadalupe River.

Ang warning system usab sa siyudad ipaagi sa Command Center diin kung dunay mga advisory gikan sa nagkadaiyang ahensiya sa gobyerno, i-broadcast kini sa two-way radio sa tanang barangay. (BANAT NEWS)