May kalalis gipusil-patay sa “striker” sa PDEA-7
CEBU, Philippines - Usa ka 29-anyos nga lalaki gipusil patay sa gikatahong “striker” sa PDEA 7 diha sa Doña Modesta Gaisano St., Sitio Sudlon, Barangay Lahug ning syudad sa Sugbo niadtong Sabado sa gabii.
Gipusil patay si Florencio Montañez Lopez Jr., 29 anyos human makalalis sa iyang kainom nga usa ka Amay Duran.
Niasoy sa Banat News ang imbestigador sa maong kaso nga si SPO2 Wetzel Berry ug matud pa niya nga nag-inom sa daplin sa kalsada ang duha apan naglalis sa wa pa matinong hinungdan.
Matud pa nga nakakita ang iyaan sa biktima nga si Thelma Puebla nga nagpuyo sa maong dapit niduol lang og kalit ang usa ka lalaki nga si Lupe Donaire nga matud pa usa ka “stiker” o suloguon sa Philippine Drug Enforcement Agency-7 ug dayon gipusil sa likod sa ulo ang biktima hinungdan sa kamatayon niini.
“Matud pa sa informant nga naglalis si Amay ug ang biktima. Nikalit lang ang suspek nga gikan sa luyo diretso pusil sa biktima,” si Berry miingon.
Wala pa matino kung unsa nga pusil ang gigamit sa pagpatay sa maong biktima apan duda sa maong imbestigador nga usa kini ka revolver kay wala sila’y nakuhang basiyo sa crime scene.
Si Berry miingon nga daling nisibat si Amay samtang si Lupe padayon pud nga gipangita.
Gidala pa sa mga sakop sa Emergency Respond Unit Foundation ang biktima ngadto sa ospital apan gideklarar kini nga dead on arrival. -/EIM (BANAT NEWS)
- Latest
