Senior citizens nagkaguliyang sa ayuda

CEBU, Philippines - Daghang opisyal sa kahugpongan sa mga senior citizens sa Dakbayan sa Sugbo ang nangasuko kagahapon kay wala na sila hatagi og katungod sa pagpanghatag sa cash assistance ngadto sa ilang mga sakop.

Kini human ang mga kawani na sa Barangay Mayor’s Office ang nihimo sa ilang gimbuhaton.

Si Konsehal Philip Zafra, presidente sa Association of Barangay Councils (ABC), niingon nga ang kaguliyang nahitabo sa mga barangay nga ang mga kapitan alyado ni kanhi mayor Michael Rama. Kadaghanan sa 80 ka barangay kapitan kaalyado sa Team Rama.

Kini maoy hinungdan nga si Mayor Tomas Osmeña nagmugna og BMO aron maoy moasikaso sa mga gimbuhaton nga ang uban giingong trabaho sa mga opisyal sa barangay.

Sa Barangay Tisa nangreklamo ang mga opisyal sa kahugpongan sa mga senior citizens kay wala sila hatagi og masterlist sa makadawat og tag P1,000 nga hinabang gikan sa City Hall samtang bisan ang priority numbers, ang BMO maoy nanghatag.

Si Domingo Chaves, pangulo sa Office of Senior Citizens Affairs (OSCA) sa dakbayan, niingon nga ang mga opisyal sa lainlaing senior citizens association sa kabarangayan pasalmuton gyud unta sa kalihukan sa pagpanghatag sa cash assistance kay sila man ang nakaila sa ilang mga sakop.

Samtang nabantayan nga daghang senior citizens ang wala gyud makakobra kagahapon sa kabarangayan. Matud ni Chaves nga kadtong wala makakobra kagahapon, may higayon pa pagkobra sa City Hall apan kinahanglang dili palapason ang 10 ka adlaw. Ang 67,300 ka senior citizens sa dakbayan hatagan og tag P1,000 matag buwan ug kadtong gipanghatag kagahapon para na sa buwan sa Mayo.

Sa Kapitolyo, giawhag sa Hunta Probinsiyal ang mga lungsod ug siyudad nga moduso sa bag-ong listahan sa mga senior citizens sa buhatan ni Bokal Jose Mari “Tata” Salvador ingon man sa Provincial Social Welfare and Development Office (PSWDO).

Kini aron masuta kun pila gyud ka senior citizens ang target beneficiaries sa lalawigan alang sa mga medical-health missions gikan sa Kapitolyo.

Matud ni Salvador nga sa pagkakaron ang PSWDO nakatala na og kapin 200 mil ka senior citizens.

Gawas sa medical mission, ang Probinsiya sa Sugbo aduna say programa nga “Halad ni Lolo ug Lola” diin ang mga senior citizens makadawat og bugas ug relief packs gikan sa Kapitolyo. - /GMR) (BANAT NEWS)