Mag-uuma gipusil patay
CEBU, Philippines - Patay ang 50-anyos nga biyudo nga mag-uuma nga gipusil sa wala pa hiilhing mamumuno sa Sitio Kab-asan, Barangay Marmol, Lungsod sa Tuburan alas 9 pasado sa buntag sa niaging adlaw.
Si Police Officer 3 Dandred Lambo sa Tuburan Police Station niila sa biktima nga si Servando Aparicio nga nagpuyo sa maong dapit.
Matud ni Lambo nga ang anak sa biktima nga si Renante maoy nakamatikod sa nagsunod-sunod nga lanog nga boto sa armas samtang nagluto kini sa ilang panimalay.
Dali kining nangayo og panabang sa barangay tanod nga si Peter Dorado ug ilang gisusi ang gigikanan sa mga boto sa armas ug nakita na lang nila ang nagkadugo nga patay’ng lawas sa biktima diha sa iyang umahan.
Dugang ni Lambo nga dihang gisusi ang patay’ng lawas sa biktima ilang nasuta nga nakabaton kini og samad pinusilan sa ulo ug dughan nga nakaingon sa iyang kamatayon.
Si Dorado niingon nga wala’y nakakita sa mga mamumuno ug wala sab masayud ang sakop sa pamilya sa biktima kung may gikaaway ba kini sa maong dapit.
Gumikan niini, sumala pa ni Lambo nga mohimo pa sila og dugang imbestigasyon sa pagsuta sa hinungdan sa maong pagpatay sa biktima. Romeo T. Limpangog ug Camille L. Pateres (BANAT NEWS)
- Latest
