2 ka mediamen motrabaho sa Cebu City Hall

CEBU, Philippines - Duha ka sakop sa media, motrabaho sa Cebu City Hall, ug ang usa kanila maoy mangulo sa Cebu City Office for Substance Abuse Prevention (COSAP) sugod karong Hunyo 1, aron mopadayon sa pag-drug test sa mga kawani sa dakbayan ug kabarangayan.

Ang appointment papers nila ni Garry Lao isip bag-ong hepe sa COSAP ug ni Malou Inocando-Tabar nga maoy bag-ong Tourism Officer sa dakbayan gipirmahan na ni Mayor Tomas Osmeña.

Si Lao mitug-an nga mosugod na siya pagtrabaho isip pangulo sa COSAP karong sunod semana kay mi-resign na siya pagka konsehal sa Barangay Tejero ingon man pagka reporter sa The Freeman, ang igsuong mantalaan sa Banat News.

Ang Personnel Chief sa City Hall nga si Atty. Marie Velle Abella miingon nga mahimong malangan pa hinoon ang pag-asumir ni Tabar sa pagka-Tourism Officer sa Dakbayan sa Sugbo tungod kay kinahanglan pa siya nga mo-resign sa pagkakonsehal sa Barangay Banilad ug sa pagka-broadcaster sa usa ka TV station.

Sila si Lao ug Tabar pareho nga milansar pagka-konsehal sa Cebu City North District sa miaging piniliay apan wala makadaog.

Matud ni Lao nga ipadayon niya ang mga nasugdan nga proyekto ni COSAP chief Alice Utlang, ilabi na ang pagpaninguha nga ang dakbayan makasulod og kontrata sa usa ka Non-Government Organization (NGO) nga makahimo og drug-rehabilitation center nga magamit sa mga kabus nga pasyente nga wala’y bayad.

Ubos sa mao nga sistema, ang kagamhanan sa dakbayan mogahin og salapi isip iyang counterpart, aron ang mga kabus nga drug dependents makapa-rehabilitate nga wala na’y bayad. (BANAT NEWS)