Retiradong pulis gipatay
CEBU, Philippines - Naligo sa kaugalingong dugo ang usa ka retiradong polis human kini gipusil-patay sa nag-inusarang mamumuno kagabii sa Sitio Abellana, Bo. Luz, siyudad sa Sugbo.
Giila ang biktima nga si Pedrito Cabornay, 60 anyos, residente sa nahisgutang lugar.
Sigon sa asawa sa biktima kansang ngalan gipugngan alang sa iyang seguridad nga niadtong 2010 lang ni-retire ang iyahang bana isip police ug katapusan kining nadestino sa Talisay City. Dugang sa asawa, wala nakahisgot ang iyahang bana nga duna kini kontra o kaha nakabangi.
Apan kini midugang nga sa wala pa mahitabo ang pagpamusil giingong dunay miduol sa biktima ug dihang milakaw na ang maong tawo adunay miduol sa biktima ug nangutana kun kinsa kadto.
Matud pa mitubag ang biktima asset kadto sa PDEA. Wala magdugay adunay laing lalaking nagtaptap sa nawong nga miduol sa biktima ug gipusil kini sa suwang ug milapos ang bala sa iyang ulo.
“Wala man siya’y hisgot parte sa trabaho, ni-apply lang siya og tanod kadiyot pero mga tuig ra,” matud pa sa asawa sa biktima.
Si Senior Police Officer 2 Romel Bancog mosubay pa sa kuha sa CCTV sa dapit kun diin nahitabo ang insidente.
Si Bancog miingon nga ang mga silingan mihulagway sa biktima nga maayong tawo ug wala kini kontra.
Sigon usab sa mga naa sa dapit nakadungog na lang sila og buto ug wala na nila makita pa ang mipusil sa biktima. (BANAT NEWS)
- Latest