P3.5M butane cannisters gisakmit

CEBU, Philippines - Muabot sa P3.5 milyones ang kantidad sa liboan ka butane cannisters ug gamit sa pag-refill ug gatusan nga liquefied petroleum gas (LPG) ang nasakmit sa duha ka refilling stations sa Lungsod sa Minglanilla.

Ang Provincial Environment and Natural Resources Office nakig-alayon sa kapolisan sa lungsod alang sa maong operasyon.

Matud ni Jayson Lozano, ang enforcement division head sa PENRO, nga kalapasan sa Provincial Ordinance 2016-15 o pag-regulate sa butane cannister ug Presidential Decree 1865 nag-regulate sa pag-refill ug pag-distribute sa butane cannisters ang atubangon sa tulo ka tawo nga nadakpan niadtong Biyernes.

Unang naaresto si Roger Amadio, 47, kinsa nasakmitan og 2,950 ka cannisters nga gisudlan og butane gas ug 1,140 ka wala’y sulod nga cannisters.

Si Lozano nagkanayon nga si Amadio ang nagbutyag kung asa siya magkuhaan og supply.

Kini ang hinungdan sa pagkasakmit sa 1,330 ka cannisters nga may refill nga butane; 2,668 nga wala’y sulod nga cannisters ug 419 nga assorted LPG tanks, tulo ka butane refilling machines, upat ka compressors, fire extinguishers ug duha ka multi-cabs sa duha ka refilling stations sa Barangay Vito.

Sikop sa operasyon si Razel Gaballo, 21, taga Moalboal, ug Logie Gabuya, 36, taga Dakbayan sa Davao nga nagtingkagol na karon sa prisohan sa Minglanilla.

Si Lozano nagkanayon nga sa kadaghan nga ilang nasakmit, niadtong Domingo pa sila nahuman og hakot sa mga cannisters ug LPG tanks diin 22 ka biyahe sa mini-dump trucks ang nahimo.

Ang mga wala’y sulod nga cannisters didto gidala sa usa ka compound sa Barili samtang ang uban didto sa Cebu International Convention Center (CICC).

Si Baltazar Tribunalo, pangulo sa PENRO, nibahad sa mga ilegal nga nag-refill sa mga butane cannisters nga paabuton nga aduna pay sunod-sunod nga operasyon ang ilang himoon karon nga padayon ang ilang pagbantay sa mga refilling stations.

Siya subling nipahimangno batok sa pag-refill sa mga cannisters gamit ang butane gas tungod kay posible kining mobuto nga maoy hinungdan sa sunog. (BANAT NEWS)