Dakong mall sa SRP nisanong

CEBU, Philippines – Ang kadagkoan sa SM Seaside padayong nangguba sa gihimo nila nga development daplin sa South Coastal Road aron nga makumbinsir nila si Mayor Tomas Osmeña nga hatagan na sila sa gikinahanglang permit.

Ang Office of the Building Officials (OBO) sayo pa mipahibalo nga wala tumana sa tagdumala sa SM Seaside ang gilatid nga setback gikan sa karsada kun motukod og edipisyo.

Si Mayor Tomas Osmeña nahinangop niining maong kalamboan nga ang tagdumala sa maong higanteng tindahan mihimo na og lakang aron nga mahimoan nila og setback ang dapit daplin sa karsada.

Gipasabot ni Osmeña nga kun dili niya pugson ang tagdumala sa mga balay patigayon daplin sa karsada sa South Road Properties nga mobutang og setback, moabot ang higayon nga maglisod na ang kagamhanan kun magkinahanglan nga palapdan ang karsada. Ang SM Seaside nagbutang unta og mga ornamental plants daplin sa karsada nga makapadugang sa kaanindot sa ilang bag-ong natukod nga building, apan ang kadagkoan sa OBO miinsister nga kinahanglang tumanon gayud ang lagda.

Sa mga dagkong balay patigayon sama sa SM Seaside, ang setback gikan sa property line, kun gikan sa utlanan sa aseras, kinahanglang labing menos 10 ka metros.

Gitataw ni Osmeña nga wala siya’y tinguha nga pasirad-an ang SM Seaside basta motuman lang sa lagda. Nabantayan hinoon nga karong gihawanan na sa SM Seaside ang daplin sa karsada, misamot kaanindot ang maong lugar. Ang laing balay patigayon nga gimandoan nga mohimo’g setback gikan sa South Coastal Road mao ang tagdumala sa padayon pa nga gitukod nga Il Curso nga gipanag-iya sa Filinvest Land Inc. /EIM (BANAT NEWS)