Ikaduhang runway sa MCIA aprub

CEBU, Philippines – Giaprobahan sa Mactan Cebu International Airport Authority (MCIAA) Board ang sugyot ni Kongresista Raul Del Mar nga sugdan na ang pagtrabaho sa ikaduhang runway sa tugpahanan sa Mactan.

Ang MCIAA Board nipasar og resolusyon niadtong Huwebes atol sa ilang regular meeting nga gipahigayon sa Cebu Ports Authority (CPA) Boardroom.

Ang pag-aprobar sa sugyot naglakip sa paggasto sa pundo gikan sa premium nga kantidad og P14.4 bilyones nga gibayad sa GMR-Megawide Cebu Airport Corporation (GMCAC) nga mao karon ang nagdumala sa MCIA Terminal.

Kahinumduman nga ang GMCAC ang nidaog sa bidding sa pagpatukod sa MCIA New Passenger Terminal Building ug sa pagdumala niini ubos sa Public-Private Partnership (PPP).

Si Del Mar ang nakapugong sa P14.4 bilyones nga ipabilin sa MCIAA human kini gipabutang sa National Treasury.

Niadtong Nobiyembre 2015, ang Department of Transportation and Communications (DOTC), nga karon Department of Transportation (DOTr) na, ug ang Department of Finance nagkasabot nga ipabilin sa MCIAA ang kwarta.

Apan subay sa balaud, ang MCIAA pabayron og P4.2 bilyones nga buhis ngadto sa Bureau of Internal Revenue ug laing P4.9 bilyones nga dividends ngadto sa National Treasury maong P4.9 bilyones na lang ang magpabilin sa MCIAA nga maoy gastuhon sa pag-ugmad sa ikaduhang runway.

Mapasalamton si Del Mar sa MCIAA Board sa pagsanong sa iyang sugyot aron dili mabiyaan ang tugpahanan sa Mactan sa international airports sa ubang dapit sa Kabisay-an ug Mindanao nga padayon karong giugmad. /EIM (BANAT NEWS)