‘Bike for peace’ ipahigayon
CEBU, Philippines - Nagplano ang Police Regional Office-7 sa paglibot sa tibuok Probinsiya sa Sugbo pinaagi sa “bike for peace”.
Si PRO-7 Director Noli Taliño nagkanayon nga kini sama sa ilang gihimo sa Probinsiya sa Bohol aron sab pagpakita nga malinawon ang Sugbo.
Gipadayag ni Taliño ang maong plano atol sa iyang pagbisita kang Gobernador Hilario Davide III kagahapon sa buntag.
Lakip sa kalihukan sa “bike for peace” mao ang pagpaubos sa seminar sa mga tag-iya og resorts, kabarangayan ug stakeholders kung unsaon pag-organize, pag-monitor, paghipos og mga report ug paghatag og report ngadto sa mga awtoridad.
Gibutyag ni Taliño nga imbitaron usab nila ang tanang bikers sa Sugbo nga mosalmot sa kalihukan.
Si Davide nipadayag sa iyang tinguha nga mokuyog sa paglibot sa tibuok probinsiya pinaagi sa pagsakay og bisekleta.
Matud ni Davide nga gihangop niya ang maong plano sa kapolisan aron mapakita nga ang Sugbo nagkahiusa ug luwas kini nga lugar sukwahi sa taho sa hulga sa mga sakop sa Abu Sayyaf.
Ang kalihukan pagpakita sab kini sa kalampusan sa pagpuhag sa bandidong grupo sa ASG sa Bohol. Brenda D. Batuto ug CNU Interns Mary Cris A. Remata ug Pamela Faith D. Pogoy (BANAT NEWS)
- Latest
