Wa diay mag-apura
Sa kataposan, apan human una sa duha ka buwan nga kalangay, giaprobahan na gyud sa Malakanyang ang P1,000 nga umento sa binuwan nga pension sa Social Security System (SSS). Napatuman ang pasalig sa kadagkoan sa SSS nga ang umento nagsugod sa Enero karong tuiga.
Sa unang tulo ka Biyernes sa sunod buwan madawat sa mga pensionado sa SSS ang mga umento sa tulo ka hugna: Ang umento sa Enero madawat sa Marso 3, ang umento sa Pebrero madawat sa Marso 10 ug ang umento sa Marso madawat sa Marso 17.
* * *
Ang pakigbisog alang sa umento sa pension sa SSS napuno sa kakuwang ug pagpakabana alang sa kabus nga mga pensionado, panagbangga sa Malakanyang ug sa Kongreso, makauuwaw nga pamolitika ug taas nga pagpaabot.
Sulod sa dugay na nga panahon, gipasagdan sa SSS ug Malakanyang ang makamatay nga pension nga dili gani paigo alang sa pagkaon ug tambal sa retiradong mga sakop. Sa dihang nakalusot na gyud ang nalangay na pag-ayo nga umento sa pension dayong eleksiyon sa niaging tuig, nagbuot-buot ang mga kongresista ug mga senador sa wa’y pagkonsulta sa Malakanyang.
* * *
Si Presidente Rodrigo Duterte igo lang nisakay sa kontrobersiya. Gidasonan niya ang P2,000 nga umento sa binuwan nga pension sa wa’y pagsusi sa aktuwal nga kahimtang sa panudlanan sa SSS.
Pagbanos niya sa Malakanyang, nanlipaghong sa kauwaw si Duterte dihang gibaraw sa iyang economic managers ang umento kay, kun ipamugos gyud, seguro nga makapabangkarota sa pundo. Mao nga napugos pag-uyon nga gawas nga anam-anamon ang umento, umentohan pa gyud ang binuwan nga bayranan sa aktibong mga sakop sa SSS.
* * *
Nikalit lang og gawas gahapon, human sa dul-an duha ka buwan nga pinaabot, ang dokumentong nag-aprobar sa umento sa P1,000 nga pension sa SSS. Apan pinirmahan lang ni Executive Secretary Salvador Medialdea, nalinga gihapon sa lain ug posibleng mas mahinungdanon ug mas dinaliang mga butang si Duterte.
Klaro nga gihangan ang Malakanyang sa pagbisto sa SSS nga niadto pa nga Enero silang andam paghatag sa umento. Apan wa kalihok kay wa pa pirmahi sa Malakanyang ang gikinahanglang mga dokumento. Nabisto nga, sukwahi sa iyang pagarpar, wa diay mag-apura si Duterte pagtabang sa SSS pensioners.
* * *
- Latest
