Pyro display sa malls sa Talisay gisusi

CEBU, Philippines - Nisuroy ang kabomberuhan sa Dakbayan sa Talisay sa mga malls aron personal nila makita kun gisunod ba sa mga manindahay ang pagpatuman sa luwas nga pagbaligya og pyrotechnics. Unang giadto ang Starmall sa Lawaan I apan wala pay display nga pyrotechnics.

Ang mga tenants nibutyag nga sa gawas sa mall sila mag-display ug nisaad nga ilang tumanon ang mga lagda nga gitambag sa kabomberuhan aron malikay sa disgrasya.

Sa South Town Centre sa Tabunok nakita nga duha ka tindahan na ang nag-display sa ilang mga pyrotechnics diha gyud sa sulod sa mall.

Si Fire Chief Inspector Randy Mendaros nagkanayon nga dili peligro ang lugar nga gibaligyaan tungod kay sa pagsulod sa mall, inspeksiyunon na man daan ug ipatangtang ang mga butang nga gidili.

Si Minerva Dorimon, tindera sa Golden Dragon, niingon nga nagsugod pa lang sila sa pag-display ug ila gyud nga isulod sa ilang hunahuna ang paglikay sa disgrasya.

Sa pagkakaron wala pa kaayo silay customer ug gilauman nga modaghan kini sa sunod na nga semana.

Ang kadagkuan sa South Town Centre nibutyag nga duha lang ka stalls ang ilang gitugutan nga mamaligya og pyrotechnics aron dali ra nila ma-monitor.

Asoy pa nila nga wala na silay lain pa nga dawaton nga kompaniya nga buot mobaligya og pyrotechnics sa ilang mall. Dugang ni Mendaros nga lahi ang pyrotechnics tungod kay mobuto man kini gamit ang fuse ikompara sa pabuto nga duslitan sa iyang pabilo. (BANAT NEWS)