Bus nakabangga, 1 patay, 6 angol
CEBU, Philippines - Usa patay samtang unom ka pasahero ang angol sa aksidente sa bus ug traysikol sa Barangay Talisay, Santander niadtong Biyernes sa hapon.
Si Police Officer 1 Dante Deniega sa Santander Police Station nagkanayon nga usa ka Antonieta Alepar, 37, taga Sitio Pier 3 sa maong lugar ang gideklarar nga patay sa Vicente Sotto Memorial Medical Center alas 7 sa gabii sa maong adlaw.
Matud ni Deniega nga ang Ceres Bus nga gimaneho ni William Ostia, 42, taga Dakbayan sa Bogo, ang nawad-an og kontrol dihang nigawas sa garahe ala una sa hapon.
Ang bus niigo sa nakaparada nga traysikol nga gimaneho ni Mansueto Langayan, Jr. ug sa tulo ka kan-anan sa maong dapit.
Ang mga pasahero sa bus nakaangkon og mga bun-og ug si Alepar kinsa naglingkod sa atubangan ang naggrabehan.
Ang mga naangol nailhan nga sila si Edwin Bungcasan, 46, taga Talisay, Santander; Dominic Cordero, 29, taga Zamboanga City, Analie Abasolo, 27, Jenny Salimbot, 21, Jay Abasolo, 21, pulos taga Zamboanga City ug Johnrel Hornada, 15, taga Talisay, Santander.
Matud ni Deniega nga ang tag-iya sa tulo ka kan-anan ug sa traysikol ang dili mopasaka og kaso batok sa drayber sa bus human sila nagkasabot.
Apan kasamtangan nga gitanggong si Ostia sa lock-up jail sa Santander Police Station alang sa pagpasaka og kasong reckless imprudence resulting to homicide and multiple injury and damage to property. (BANAT NEWS)
- Latest
