Babaye patay sa baybayon

CEBU, Philippines - Nagkaob na nga nakit-an ang patay’ng lawas sa usa ka babaye sa baybayon sa Sitio Borromeo, Pooc, Dakbayan sa Talisay niadtong Biyernes sa gabii.

Ang mga residente sa lugar ang wala kaila sa biktima nga gibana-banang nagpangedaron og 20-anyos.

Matud ni PO3 Stephen Sefuesca sa Talisay City Police Station nga si Renato Malaay, 55-anyos, caretaker sa usa ka resort, nga iyang nakit-an ang lawas sa babaye hinungdan sa iyang pagtawag sa mga barangay tanod kinsa mao na sab ang nitawag sa kapolisan.

Sa ilang pagsusi, si Sefuesca niingon nga ilang nakita nga adunay bun-og sa iyang dagway ang biktima agi og gibunalan og gahi nga butang.

Siya nagkanayon nga pink ang color sa senina sa biktima ug nagsul-ob kini og maong nga short pants. Sigun pa niya nga pution ang maong babaye ug mobuon lang kini og pamarug.

Dugang pa niya nga ilang gidala sa Saint Francis Funeral Homes ang patay’ng lawas ug nanawagan sa pamilya nga kun kinsa ang  nawagtangan og paryente sa pagsusi na lang sa punerarya.

Hinuon ilang ipaubos sa autopsy ang patay’ng lawas aron masuta kun unsa gyud ang hinungdan sa iyang kamatayon. (BANAT NEWS)