2 jail guards sa BJMP-7 ipatangtang

CEBU, Philippines - Duha ka jail guards sa Bureau of Jail Management and Penology sa Central Visayas ang girekomendar nga taktakon sa serbisyo subay sa kamanduan ni Presidente Rodrigo Duterte sa paglimpyo sa mga ahensiya sa gobiyerno gikan sa ilegal nga kalihukan sama sa paggamit og ginadili nga drugas.

Kini ang gitug-an ni Jail Senior Inspector Medardo Dungog, deputy chief for operations sa BJMP-7.

Matud ni Dungog nga subsob ang ilang kampanya batok sa ilegal nga drugas bisan og wala silay marching order gikan sa ila ulohang buhatan tungod kay matag karon ug unya aduna silay gipahigayon nga surprise drug test sa ilang mga kawani.

Sumala pa ni Dungog nga bisan unsa ka gamay sa reklamo nga ilang madawat o bisan anonymous letter nga moabot sa ilang buhatan batok sa ilang sakop ila kining atimanon.

Gitug-an ni Dungog nga niadtong nilabay nga semana gipadala na nila ang rekomendasyon diin usa niini ang nagpositibo, usa ang nagdumili pagpaubos sa drug test, samtang dunay lain nga empleyado ang ni-absent without official leave sa iyang trabaho.

Dugang ni Dungog nga ang ilang ulohan nga buhatan mao na ang mosusi sa giduso batok sa ilang sakop kinsa kasamtangan karon nga gibutang sa ilang rehiyonal nga buhatan. (BANAT NEWS)