Walo ka bata nangalanag

CEBU, Philippines - Walo ka mga tinun-an sa Grade 4 sa Malubog Integrated Schools ang gidala sa Vicente Sotto Memorial Medical Center kagahapon sa buntag human giingong nagsakit ang tiyan ug nagsuka-suka human nikaon og ice pop nga gibaligya gawas sa tulonghaan.

Matud pa sa usa ka tinun-an nga lalaki, atol sa ilang recess human niya kaon og kan-on nikaon siya og ice pop apan paglabay sa pipila ka gutlo nisakit iyang tiyan.

Laing babaye nga tinun-an nitug-an nga nakakaon usab kini og ice pop apan sama sa nahaunang tinun-an nisakit iyang tiyan samtang ang uban usab niyang mga classmates mao usab ang gibati ug dunay nagsuka-suka.

Si Joy Cangmaong, ang driver sa Barangay Malubog maoy midala sa mga bata sa tambalanan.

Hinuon ang uban kanila nakauli ra kagahapon sa hapon human mahatagi og clearance sa mga doctor, apan aduna gyuy nagpa-admit sa pribadong tambalanan.

Si Melissa Mozar, magtutudlo sa high school maoy nag superbisar sa mga tinun-an pabalik sa Malubog nibutyag nga dili pa sila makatumbok kung unsa gayud ang nakaon sa mga bata.

Si Kapitan Marjorita Cangmaong nibutyag nga mohimo pa sila og pakisusi sa maong hitabo. (BANAT NEWS)