Night market dayon sunod semana

CEBU, Philippines - Gipaabot nga sunod semana hingpit na nga magsugod ang pagpahigayon og Night Market sa Dakbayan sa Sugbo human ang kagamhanan sa siyudad duna nay nakit-an nga lugar aron adto ipahimutang ang mga manindahay.

Matud sa pangulo sa Division for the Welfare of the Urban Poor, Genevieve Alcoseba, kinsa usa sa gitahasan sa pagtan-aw sa Night Market nga duha ka dalan ang ilang gikonsiderar nga pahigayunan sa kalihukan.

Kini mao ang Borromeo Street ug eskina Leon Kilat ngadto na sa dalan Sanciangko ug Legaspi Street eskina D. Jakosalem paingon sa dalan Manalili.

Tungod sa kagamay sa maong lugar, dul-an sa 500 ang nalakip sa lista nga mga manindahay ang mahimong makatinda pinaagi sa paggrupo og tulo. Kinahanglan nga apil sa grupo kadtong napaubos gyud sa validation sa DWUP.

Ang bayran nga arkabala mao ang P20 ngadto na sa P50 depende sa masabutan kada adlaw.

Makigtagbo pa ang DWUP sa mga manindahay aron sabutan kun pila ang ilang bayran matag adlaw alang sa cleaners, marshal ug sa kuryente nga gamiton. (BANAT NEWS)