Rubout di shootout ang nahitabo kang Espinosa - NBI
CEBU, Philippines - Dili shootout kondili rubout ang nahitabo nga niresulta sa kamatayon ni kanhi Albuera mayor Rolando “Daddy Onik” Espinosa Sr., sumala pa sa imbestigasyon sa National Burea of Investigation.
Si Espinosa kinsa gipasanginlang nalambigit sa negosyo sa illegal drugs unang gika-report sa Criminal Investigation and Detection Group (CIDG) nga nisukol kanila atol sa pag-implimentar nila og search warrant diha sa sud sa Baybay Sub-Provincial Jail.
Apan gumikan sa mga sirkumstansya ug mga pagduda, naghimo og Senate inquiry bahin niini ug gipaubos sa imbestigasyon ang mga sakop sa CIDG-8 nga gipangulohan ni Supt. Marvin Marcos.
Sumala pa sa report sa Philstar.Com, ang NBI mirekomendar ngadto sa Department of Justice nga pasakaan og kasong multiple murder ug perjury charges ang 24 ka mga sakop sa CIDG-8 ug uban pang indibidwal.
Gawas kang Espinosa, napatay usab sa maong hitabo ang laing inmate nga si Raul Yap, ang duha gipasanginlan nga armado ug nanukol sa mga polis niadtong kaadlawon sa Nobiyembre 5.
"After conducting an exhaustive investigation of the incidents surrounding the killing of Mayor Espinosa and Yap, the NBI concluded that the testimonies of several witnesses had disputed the claim of an alleged shootout between the CIDG Operatives and inmates Mayor Espinosa and Raul Yap but a 'rubout,” sumala pa sa gipagawas nga pamahayag sa NBI.
Girekomendar usab sa NBI ang pagpasaka og kaso batok nilang Police Chief Inspector Leo Diao Laraga, PO3 Norman Abellanosa ug Paul Olendan kabahin sa gihulagway sa NBI nga malisyosong pagkuha sa search warrant.
Sumala pa sa NBI niadtong Oktubre 30, lima ka adlaw sa wala pa kini nahitabo, nilusad og "Oplan Galugad" sa maong prisohan diin nakuha ang mga cellphones sa inmates. "It was, therefore, impossible for Espinosa and Yap to possess these firearms and illegal drugs inside their respective cells on the night of the supposed implementation of the search warrants," dugang pa sa NBI.
Ang tigpamaba sa NBI nga si Ferdinand Lavin miingon nga ‘premeditated’ ang pagkapatay kang Espinosa ug matud pa wala’y ikasukol ang mayor dihang kini gipusil. – Wires (BANAT NEWS)
- Latest
