Wa pay nilukat og permit sa firecrackers sa Talisay
CEBU, Philippines - Wala pay nikuha og permit sa Bureau of Fire Protection sa Dakbayan sa Talisay alang sa pagpamaligya og pabuto sa nagsingabot nga Pasko ug Bag-ong Tuig.
Matud ni Chief Insp. Randy Mendaros, hepe sa BFP sa Talisay, nga adunay duha ka malls sa siyudad ang nikuha na apan pyrotechnics ang ilang ibaligya. Asoy pa ni Mendaros nga lahi ang pyrotechnic tungod kay adto man kini sa ibabaw mobuto.
Hinuon si Mendaros nibutyag nga gusto niya nga diha sa dakung hawan atbang sa City Hall himuon ang designated area alang sa mga mamaligya og pabuto. Sa una ang Barangay Lagtang ang ilang giila nga firecracker zone apan daghan na nga edepisyo ang natukod sa maong lugar.
Sigun pa niya nga iyang hangyuon ang mga konsehal nga pakig-estoryahan ang tag-iya sa luna nga iyang giingon aron luwas ug likay sa disgrasya sa pabuto ang maong lugar.
Dugang ni Mendaros nga kung aduna man gani sila’y makit-an nga namaligya og pabuto bisan asang dapit sa Talisay ila gyud kining sakmiton. (BANAT NEWS)
- Latest